Ellilífeyrir hækkaði um 3,5% um áramótin

Fjárhæðir greiðslna TR hækkuðu um 3,5% um áramótin, eða 1. janúar 2020. „Ellilífeyrir" verður að hámarki  tæpar 256.800 kr. á mánuði. Stjórnvöld ákveða einhliða upphæðina (prósentu hækkun). Eitt af baráttumálum LEB er og hefur verið að eftirlaun verði í samræmi við almenn kjör í landinu og að eldri borgurum verði tryggð afkoma í samræmi við opinber framfærsluviðmið, en enn er brestur á því að það sé tryggt. LEB mun eftir sem áður halda baráttunni áfram og kallar alla til liðsinnis sem vilja leggjast með á árarnar að tryggja ölllum „áhyggjulaust ævikvöld" eins og það er kallað á hátíðarstundum. Ríflega 33 þúsund manns fá greiddan „ellilífeyri“ frá Tryggingastofnun, eins og það heitir í lögunum. Samkvæmt ársskýslu stofnunarinnar frá 2018 koma um 45% tekna „ellilífeyrisþega“ frá TR en um 35% frá lífeyrissjóðum.  Almennur lífeyrisaldur er 67 ára. Þeir sem eru 65 - 67 ára eiga rétt á greiðslum frá TR að uppfylltum ákveðnum skilyrðum. Á heimasíðu Tryggingastofnunar segir meðal annars.Ellilífeyrir

• Ellilífeyrir er að hámarki 256.789 kr. á mánuði.
• Heimilisuppbót er að hámarki 64.889 kr. á mánuði.
• Ellilífeyrir og tengdar greiðslur eru að hámarki 321.678 kr. á mánuði hjá þeim sem búa einir (með heimilisuppbót). Heimilisuppbótin fellur niður ef fólk hefur búsetu í öðru landi.
• Almennt frítekjumark skattskyldra tekna er 25.000 kr. á mánuði.
• Sérstakt frítekjumark atvinnutekna er 100.000 kr. á mánuði.

Þeir sem eru 65 ára og eldri og hafa búið á Íslandi í minnst þrjú ár eiga einhvern rétt á ellilífeyri. Í reiknivél er hægt að slá inn mismunandi forsendur og sjá niðurstöðu. Þeir sem eru að hefja töku ellilífeyris eru hvattir til að kynna sér vel þá kosti sem í boði eru.Fylgiskjöl með umsókn Þegar sótt er um ellilífeyri þarf að skila inn umsókn en auk þess þarf að skila inn eftirtöldum gögnum:

• Staðfesting á að sótt hafi verið um hjá lífeyrissjóði
• Tekjuáætlun
• Upplýsingar um nýtingu skattkorts

Hægt er að skila inn öllum gögnum í gegnum Mínar síður.Tryggingastofnun ríkinsins flutti á síðasta ári að Hlíðarsmára 11, Kópavogi.Þessi grein er byggð á grein af vefmiðlinum Lifðu núna